МТҚБ әкімшілік ғимараттар дирекциясының Бас энергетигі Руслан Сапаржанұлы Салинді басшылық пен әріптестері өте сенімді және жауапты маман ретінде сипаттайды.
Басқаша болуы мүмкін емес: себебі электр желілері мен жабдықтардың сенімділігі – бұл кәсіпорынның тіршілігінің негізі.
Руслан Салиннің осы мамандық бойынша 30 жылдан астам тәжірибесі бар. Осыдан 15 жылдай бұрын, 2014 жылдың басында ол ӘҒД-ға инженер-энергетик болып жұмысқа келген болатын. Мұнда ол бас энергетикке дейін көтерілді. Ал күні кеше оның еңбегі өндірісте жоғары бағаға ие болды: Энергетиктер күні қарсаңында Руслан Сапаржанұлына «Еңбек сіңірген энергетик» төсбелгісі салтанатты түрде табыс етілді.
Салиннің жетекшілігімен 24 маман тәулік бойы жұмыс істейді. Қызмет үздіксіз электрмен жабдықтауды және жабдық құралының жұмысын қамтамасыз етеді және сұраныстарға сапалы қызмет көрсетуге және энергияны үнемдеуге жауап береді.
МТҚБ жүйесінде жұмыс істеген 15 жыл ішінде оның аймағында бір рет қана форс-мажорлық жағдай орын алған еді.
«2019 жылдың қараша айында қаланың сол жағалауындағы трансформаторлық қосалқы стансада апат болды. Соның салдарынан Парламент ғимараттары да ажыратылды. Бұл жұмадан сенбіге қараған түні, таңғы төрт жарымда болды. Біз резервтік генератор қондырғысын қосып, адамдарды оятып, екі күн бойы күшейтілген кезекшілікті атқардық. Дүйсенбі күні таңертең депутаттар жұмысқа келген уақытта барлығы қалыпты жұмыс істеп тұрды. Ешкім ештеңе байқамады. Бірақ осы оқиғадан кейін біз қажеттілікті дәлелдеп, резервтік электр желісін орнаттық», – деді Руслан Сапаржанұлы өзінің ең үлкен кәсіби мәселесі туралы.
Біздің кейіпкеріміздің отбасылық өмірінде де барлығы тұрақты және орын-орнында. 33 жыл отасқан Салиндер отбасы дүниеге бір ұл және екі қыз әкеліп, аяққа тұрғызды. Қазірдің өзінде 5 немересі өсіп келеді.
«Менің хоббиім де, қуанышым да – немерелерім. Мен барлық бос уақытымды соларға арнаймын. Үй шаруасы да күтімді қажет етеді. Сондықтан демалу туралы ойлауға да уақыт жоқ», - деп жымиды Руслан Сапаржанұлы.
